Lia-Maklokek

Website ne’e hanoin hetan ba estudante timoroan sira ne’ebé hato’o sira-nia hakarak atu hala’o asaun ruma no hahoris sira-nia identidade liuhosi estabelesimentu Uma rasik iha Lisboa iha tinan 1974. Inisiativa ne’e ho naran Casa dos Timores sei hela entre kolonializmu no independénsia, entre pasadu no futuru.

Website hola naran ne’e tanba hakarak sai projetu ida ne’ebé kolaborativu. Projetu ne’e sei buka atu fahe rekursu sira ho ema ne’ebé iha interesse kona-ba istória, patrimóniu no kultura sira Timor-Leste nian. Projetu ne’e sei buka atu harii rede informasaun no fasilita asesu ba rede sira-ne’e ba ema ne´ebé hakarak prodús koñesimentu no reflete kona-ba Timor-Leste.

Eziste ona inisiativa individuál no institusionál oioin ne’ebé presiza halibur hodi fasilita kolaborasaun ho malu. Universidade Nacional Timor Lorosa’e (UNTL)  hato’o ona ninia planu atu loke Departamentu Istória no Patrimóniu. Semináriu oioin ne’ebé hala’o tiha iha Timor-Leste hatudu katak iha interesse ba istória rai ne’e nian. Instituisaun no inisiativa sira-seluk buka mós atu prezerva, estuda no habelar istória no kultura sira Timor-Leste nian (CAVR, AMRT, ANTL, CAMSTL, projetu istória  OPMT nian, CO25, Dare Memorial Museum, Balibó House Trust, nst.).

Website ne’e iha separadór oioin ne’ebé halibur informasaun atualizadu kona-ba eventu sira (konferénsia, semináriu no sorumutu sira-seluk), publikasaun sirainstituisaun no rekursu sira (universidade, arkivu, muzeu sira, nst.). Website inklui mós separadór ida ho naran komentáriuIha separadór ne’e, kolaboradór sira website nian sei hakerek (másimu liafuan 500) kona-ba istória, patrimóniu no kultura Timor-Leste nian. Sira sei hateke ba aspetu ruma ne’ebé relevante ka fó komentáriu krítiku kona-ba situasaun ka lia ruma relasiona ho tópiku website nian.

Projetu ne’e loke hela ba kolaborasaun husi liur maibé website-na’in sira  iha direitu atu muda ka la publika testu sira ne’ebé sira la husu. Karik posível, testu sira ne’ebé publika sei publika ho lian ofisiál rua Timor-Leste nian no mós ho lian inglés.Favór haruka komentáriu, krítika no sujestaun ba: casadostimores@gmail.com

Husi – Perry-Castañeda Library Map Collection East Timor (Timor-Leste) Maps, East Timor (Shaded Relief) U.S. Central Intelligence Agency 2003 (231K) pdf format (234K), https://legacy.lib.utexas.edu/maps/middle_east_and_asia/east_timor_rel_03.jpg. Consultado em 15 de junho 2020.

Luís Pinto
Lucas Brandão
Inês Amorim