Loron 3 fulan-Marsu: Loron Nasionál Veteranu sira-nian

Loron Nasionál Veteranu sira sei selebra kada tinan iha loron 3 fulan-Marsu. Loron ne’e  mak aniversáriu Konferénsia Reorganizasaun Nasionál ne’ebé hala’o tiha iha tinan 1981. Iha konferénsia ne’e sei hahú prosesu reestruturasaun no haluan Rezisténsia nian, hafoin harahun Bases de Apoio no mate kuaze lideransa FRETILIN hotu iha 1978/79.

Gil da Costa ‘Oan Soru’, Sekretáriu Estadu ba Asuntu Kombatente Libertasaun Nasionál Nacional, temi sorumutu ne’e no apela ba Timoroan hotu-hotu atu halo minutu ida hakmatek  hodi halo reflesaun kona-ba Veteranu sira-nia sakrifísiu. Sekretáriu Estadu fó-hanoin katak Veteranu sira ne’ebé sei moris daudaun karik la to’o ona ema 100 maibé bele hakerek istória funu libertasaun nasionál no Timor-Leste sai nasaun independente tanba sira-nia sakrifísiu  (haree iha-ne’e). 

Liuhosi telefone, Adriano da Câmara ‘Lintil’, eis-Adjuntu Rejiaun ‘Kruzeiru’ no atuál Prezidente Konsellu Veteranu sira Munisípiu Vikeke, konta ba ajénsia TATOLI detalle ruma kona-ba prosesu reorganizasaun Rezisténsia nian no sorumutu importante ne’ebé hala’o tiha iha fulan Marsu 1981 iha no hatete katak “loron 3 Marsu laiha ukun rasik-an mós laiha” (haree iha-ne’e).

Iha Kelikai, Loron Nasioná Veteranu sira sei komemora ho semináriu kona-ba espíritu unidade no dezenvolvimentu nasionál . Luis Américo, nu’udar Prezidente Komisaun Organizadóra, esplika katak objetivu ida husi inisiativa ne’e mak halibur Veteranu sira hodi konta ba foin-sa’e sira dezafiu ne’ebé kombatente sira hasoru iha funu libertasaun nasionál no hametin foin-sa’e sira-nia espíritu patriotizmu no nasionalizmu (haree iha-ne’e).

Selebrasaun Loron Nasionál Veteranu sira fó-hanoin katak importante tebes atu rejista no rai memória husi membru sira Rezisténsia nian (frente armada, klandestina, frente diplomátika, organizasaun estudante sira-nian) ne’ebé partisipa iha faze oioin luta libertasaun nasionál nian. Serbisu ne’e importante no urjente tebes tanba tempu la’o ba oin no Veteranu barak katuas no ferik ona.

Instituisaun oioin halibur no rai ona entrevista ka depoimentu ruma. Iha mós entrevista sira ne’ebé peskizadór individuál mak halo no uza iha sira-nia estudu akadémiku ka publikasaun. Entrevista ka depoimentu ruma iha ona transkrisaun, balun seidauk karik. Importante atu halo inventáriu no deskrisaun/rezumu ba depoimentu no entrevista sira-ne’e hotu. Ho inventáriu ne’e, peskizadór sira sei hatene di’ak liu saida mak eziste ona, informasaun ne’ebé seidauk iha no mós informasaun ne’ebé urjente liu atu halibur. Importante mós atu halo kópia-seguransa husi dokumentasaun hirak-ne’e no rai iha arkivu (ka iha arkivu seluk).  

Serbisu ne’ebé importante hanesan (maski presiza tempu kleur atu remata) mak análize ba depoimentu no entrevista hotu hodi identifika ema, organizasaun, akontesimentu, fatin, data, sira, nst. no mós halo komparasaun ho malu (cross-check) husi dadus sira-ne’e. Ho maneira ida-ne’e de’it peskizadór sira sei konsege hatene saida mak akontese iha Rezisténsia laran iha períodu no fatin oioin. 

Iha projetu ruma (CAVR, CAMSTL) atu halibur depoimentu sira kona-ba tempu Rezisténsia ne’ebé hala’o oras ne’e daudaun. Projetu hirak-ne’e bele aproveita informasaun ne’ebé instituisaun no ema seluk halibur tiha karik informasaun ne’e disponível ho maneira sistemátiku. 

Kolaborasaun entre instituisaun no peskizadór sira iha rekolla, prezervasaun, análize no atu halo disponível memória sira husi tempu Rezisténsia buat ida ne’ebé fundamentál. Kolaborasaun ne’e mak maneira d’iak liu hotu atu fó omenajen ba Veteranu sira.

Deixe uma Resposta

Preencha os seus detalhes abaixo ou clique num ícone para iniciar sessão:

Logótipo da WordPress.com

Está a comentar usando a sua conta WordPress.com Terminar Sessão /  Alterar )

Google photo

Está a comentar usando a sua conta Google Terminar Sessão /  Alterar )

Imagem do Twitter

Está a comentar usando a sua conta Twitter Terminar Sessão /  Alterar )

Facebook photo

Está a comentar usando a sua conta Facebook Terminar Sessão /  Alterar )

Connecting to %s